פג,א  שִׁיר מִזְמוֹר לְאָסָף. פג,ב  אֱלֹהִים אַל דֳּמִי לָךְ; אַל תֶּחֱרַשׁ וְאַל תִּשְׁקֹט אֵל. פג,ג  כִּי הִנֵּה אוֹיְבֶיךָ, יֶהֱמָיוּן; וּמְשַׂנְאֶיךָ, נָשְׂאוּ רֹאשׁ. פג,ד  עַל עַמְּךָ, יַעֲרִימוּ סוֹד; וְיִתְיָעֲצוּ, עַל צְפוּנֶיךָ. פג,ה  אָמְרוּ לְכוּ, וְנַכְחִידֵם מִגּוֹי; וְלֹא יִזָּכֵר שֵׁם יִשְׂרָאֵל עוֹד. פג,ו  כִּי נוֹעֲצוּ לֵב יַחְדָּו; עָלֶיךָ, בְּרִית יִכְרֹתוּ. פג,ז  אָהֳלֵי אֱדוֹם, וְיִשְׁמְעֵאלִים; מוֹאָב וְהַגְרִים. פג,ח  גְּבָל וְעַמּוֹן, וַעֲמָלֵק; פְּלֶשֶׁת, עִם יֹשְׁבֵי צוֹר. פג,ט  גַּם אַשּׁוּר, נִלְוָה עִמָּם; הָיוּ זְרוֹעַ לִבְנֵי לוֹט סֶלָה. פג,י  עֲשֵׂה לָהֶם כְּמִדְיָן; כְּסִיסְרָא כְיָבִין, בְּנַחַל קִישׁוֹן. פג,יא  נִשְׁמְדוּ בְעֵין דֹּאר; הָיוּ דֹּמֶן, לָאֲדָמָה. פג,יב  שִׁיתֵמוֹ נְדִיבֵימוֹ, כְּעֹרֵב וְכִזְאֵב; וּכְזֶבַח וּכְצַלְמֻנָּע, כָּל נְסִיכֵימוֹ. פג,יג  אֲשֶׁר אָמְרוּ, נִירְשָׁה לָּנוּ אֵת, נְאוֹת אֱלֹהִים. פג,יד  אֱלֹהַי, שִׁיתֵמוֹ כַגַּלְגַּל; כְּקַשׁ, לִפְנֵי רוּחַ. פג,טו  כְּאֵשׁ תִּבְעַר יָעַר; וּכְלֶהָבָה, תְּלַהֵט הָרִים. פג,טז  כֵּן, תִּרְדְּפֵם בְּסַעֲרֶךָ; וּבְסוּפָתְךָ תְבַהֲלֵם. פג,יז  מַלֵּא פְנֵיהֶם קָלוֹן; וִיבַקְשׁוּ שִׁמְךָ יי. פג,יח  יֵבֹשׁוּ וְיִבָּהֲלוּ עֲדֵי עַד; וְיַחְפְּרוּ וְיֹאבֵדוּ. פג,יט  וְיֵדְעוּ כִּי אַתָּה שִׁמְךָ יי לְבַדֶּךָ: עֶלְיוֹן, עַל כָּל הָאָרֶץ.

קל,א  שִׁיר הַמַּעֲלוֹת: מִמַּעֲמַקִּים קְרָאתִיךָ יי. קל,ב  אֲדֹנָי, שִׁמְעָה בְקוֹלִי: תִּהְיֶינָה אָזְנֶיךָ, קַשֻּׁבוֹת לְקוֹל, תַּחֲנוּנָי. קל,ג  אִם עֲו‍ֹנוֹת תִּשְׁמָר יָהּ אֲדֹנָי, מִי יַעֲמֹד. קל,ד  כִּי עִמְּךָ הַסְּלִיחָה לְמַעַן, תִּוָּרֵא. קל,ה  קִוִּיתִי יי, קִוְּתָה נַפְשִׁי; וְלִדְבָרוֹ הוֹחָלְתִּי. קל,ו  נַפְשִׁי לַאדֹנָי מִשֹּׁמְרִים לַבֹּקֶר, שֹׁמְרִים לַבֹּקֶר. קל,ז  יַחֵל יִשְׂרָאֵל, אֶל יי: כִּי עִם יי הַחֶסֶד; וְהַרְבֵּה עִמּוֹ פְדוּת. קל,ח  וְהוּא, יִפְדֶּה אֶת יִשְׂרָאֵל מִכֹּל, עֲו‍ֹנֹתָיו.

קמב,א  מַשְׂכִּיל לְדָוִד; בִּהְיוֹתוֹ בַמְּעָרָה תְפִלָּה. קמב,ב  קוֹלִי, אֶל יי אֶזְעָק; קוֹלִי, אֶל יי אֶתְחַנָּן. קמב,ג  אֶשְׁפֹּךְ לְפָנָיו שִׂיחִי; צָרָתִי, לְפָנָיו אַגִּיד. קמב,ד  בְּהִתְעַטֵּף עָלַי, רוּחִי וְאַתָּה, יָדַעְתָּ נְתִיבָתִי: בְּאֹרַח זוּ אֲהַלֵּךְ טָמְנוּ פַח לִי. קמב,ה  הַבֵּיט יָמִין, וּרְאֵה וְאֵין לִי מַכִּיר: אָבַד מָנוֹס מִמֶּנִּי; אֵין דּוֹרֵשׁ לְנַפְשִׁי. קמב,ו  זָעַקְתִּי אֵלֶיךָ, יי: אָמַרְתִּי, אַתָּה מַחְסִי; חֶלְקִי, בְּאֶרֶץ הַחַיִּים. קמב,ז  הַקְשִׁיבָה, אֶל רִנָּתִי כִּי דַלּוֹתִי מְאֹד: הַצִּילֵנִי מֵרֹדְפַי כִּי אָמְצוּ מִמֶּנִּי. קמב,ח  הוֹצִיאָה מִמַּסְגֵּר, נַפְשִׁי לְהוֹדוֹת אֶת שְׁמֶךָ: בִּי, יַכְתִּרוּ צַדִּיקִים כִּי תִגְמֹל עָלָי.